މަޤްސަދު

މި ކުއިޒަކީ "ބާރަކީ ފާހަގަ ކުއިޒު" ގެ ނަމުގައި މިއަހަރުގެ ވޯޓުލާ މީހުންގެ ދުވަސް ފާހަގަކުރުމުގެ ގޮތުން އިލެކްޝަންސް ކޮމިޝަނުން އިންތިޒާމުކޮށްގެން ކުރިއަށްގެންދާ ކުއިޒް މުބާރާތެކެވެ. މި މުބާރާތުގެ މައިގަނޑު މަޤްޞަދަކީ އިލެކްޝަންސް ކޮމިޝަނުން ކުރަމުންދާ މަސައްކަތްތަކާ ގުޅޭ ގޮތުން އާންމުން ހޭލުންތެރިކުރުމެވެ. އެގޮތުން، އިންތިޚާބުތަކާއި އިންތިޚާބީ ނިޒާމާ ގުޅޭ މުހިންމު މަޢުލޫމާތާއި، ސިޔާސީ ޕާޓީތަކާ ގުޅޭ މައުލޫމާތުތައް ރައްޔިތުންނާ ހަމައަށް ފޯރުކޮށްދިނުމާއި، އެ މަޢުލޫމާތުތައް ރައްޔިތުންނަށް އެނގިފައިވާ މިންވަރު ވަޒަންކުރުމަކީވެސް މި ކުއިޒުގެ މަޤްސަދެކެވެ. މި ކުއިޒް މުބާރާތް ކުރިއަށްދާނީ އިލެކްޝަންސް ކޮމިޝަނުގެ ރަސްމީ ފޭސްބުކް ޕޭޖް މެދުވެރިކޮށެވެ.

 

ކުއިޒް ކުރިއަށް ގެންދިޔުމަށް ރޭވިފައިވާ ގޮތް

1. މި ކުއިޒް ޕްރޮގްރާމް ކުރިއަށް ގެންދެވޭނީ 2024 އޯގަސްޓް މަހުގެ 16 ވަނަ ދުވަހުން ފެށިގެން 25 ވަނަ ދުވަހުގެ ނިޔަލަށް،   10 (ދިހައެއް) ދުވަހުގެ މުއްދަތަށެވެ.

2. ކޮންމެ ދުވަހަކު، ތިން އިޚްތިޔާރީ ޖަވާބު ހިމެނޭ ފަސް ސުވާލު، ވަކި ލިންކެއް މެދުވެރިކޮށް ފޭސްބުކް ޕޭޖުގައި އާންމު ކުރެވޭނެއެވެ.

3. ޖަވާބު ދިނުމުގައި ދީފައިވާ އިޚްތިޔާރީ 3 ޖަވާބުގެ ތެރެއިން އެބޭފުޅަކަށް ފެންނަ ރަނގަޅު ޖަވާބު އިޚްތިޔާރު ކުރުމަށްފަހު، ސަބްމިޓު ކުރުމުން އެދުވަހެއްގެ ޖަވާބު ފޮނުވޭނެއެވެ.

4. ކޮންމެ ދުވަހެއްގެ ސުވާލު ފޭސްބުކްގައި އާންމު ކުރުމަށް ހަމަޖެހިފައިވަނީ ހެނދުނު 10:00 ފެށިގެން 12:00 އާ ދެމެދުގެ ވަގުތެއްގައެވެ. އަދި އެ ސުވާލުގެ ލިންކް ޖަވާބު ދިނުމަށް، ހުޅުވިފައި ހުންނާނީ ޖެހިގެން އަންނަ ދުވަހުގެ މެންދުރު 12:00 އާ ހަމައަށެވެ. މިވަގުތުގެ ފަހުން ލިންކް ބަންދުވާނެއެވެ.

5. ޖަވާބު ސަބްމިޓު ކުރެވޭނީ ޖަވާބު ފޮނުވާފަރާތުގެ ފުރިހަމަ ނަމާއި، މޮބައިލް ނަންބަރު އަދި އަދި ދިވެހިރައްޔިތެއްކަން އަންގައިދޭ ކާޑު ނަންބަރު ޖެއްސެވުމަށް ކަނޑައަޅާފައިވާ ބައި ފުރިހަމަ ކުރުމަށް ފަހުގައެވެ. އެއް ނަންބަރަކުން ތަކުރާރުކޮށް އެއްފަރާތަކުން ފޮނުވާނަމަ ޖަވާބުގެ ތެރެއިން ބަލައި ގަންނާނީ އެންމެ ފަހުން ފޮނުވާފައިވާ ޖަވާބެވެ.  

6. މި ކުއިޒްގައި އިލެކްޝަންސް ކޮމިޝަނުގެ މެންބަރުންނާއި، މުވައްޒަފުންނާއި، މިފަރާތްތަކުގެ އަނބިން / ފިރިން / އަދި ދަރިންނަށް ބައިވެރިއެއް ނުވެވޭނެއެވެ.

7. ކުއިޒާ ގުޅޭ މައުލޫމާތު އިލެކްޝަންސް ކޮމިޝަނުގެ ވެބްސައިޓު www.elections.gov.mv އިން ލިބެން ހުންނާނެއެވެ.

8. މި ގަވާއިދުގައި ނުހިމެނޭ ކަމެއް ދިމާވެއްޖެނަމަ އެކަމެއް ހައްލުކުރާނީ މި ކޮމިޝަނުންނެވެ.

ކުއިޒުގެ ވަނަތައް އަދި ވަނަ ހޮވާނެ ގޮތް:-

މި މުބާރާތުގެ 1 ވަނަ، 2 ވަނަ އަދި 3 ވަނަ ހޮވުމުގައި ބަލާނީ މުޅި ކުއިޒުގެ ޖުމްލަ ސުވާލުތަކުގެ ތެރެއިން އެންމެ ގިނަ ރަނގަޅު ޖަވާބު ދެއްވާ 3 ބައިވެރިންނަށެވެ. ބައިވެރިންގެ މެދުގައި މާކްސް އެއްވަރުވެއްޖެ ހާލަތެއްގައި، ވަނަ ކަނޑައަޅާނީ ގުރުއަތުލުމުގެ އުސޫލުންނެވެ. ކުއިޒުން ވަނަ ވަނައަށް ހޮވޭ ފަރާތްތަކަށް ލިބޭ އިނާމުތަކަކީ؛

• 1 ވަނަ އަށް ހޮވޭ ފަރާތަކަށް 3000 ރުފިޔާ
• 2 ވަނަ އަށް ހޮވޭ ފަރާތަކަށް 2000 ރުފިޔާ
• 3 ވަނަ އަށް ހޮވޭ ފަރާތަކަށް 1000 ރުފިޔާ