އިންތިޚާބާ ގުޅިގެން ބާއްވާ 477 ވަނަ ޚާއްޞަ ޖަލްސާ
ތަޢާރަފް
މި ޖަލްސާގެ ރިޔާސަތު ބެލެހެއްޓެވީ ކޮމިޝަނުގެ ރައީސް ފުއާދު ތައުފީޤް އެވެ. ޖަލްސާގައި ކޮމިޝަނުގެ 4 މެންބަރުން ބައިވެރިވެ ވަޑައިގެންނެވިއެވެ. އެއީ ކޮމިޝަނުގެ ރައީސް ފުއާދު ތައުފީޤް، ކޮމިޝަނުގެ ނައިބު ރައީސް ޢަލީ ނަޝާޠު، ކޮމިޝަނުގެ މެންބަރު ޑރ.މުޙައްމަދު ޒާހިރު އަދި ކޮމިޝަން މެންބަރ ޙަސަން ޒަކަރިއްޔާ އެވެ.
ކޮމިޝަނުގެ މެންބަރު މުޙައްމަދު ޢާޞިފް ހުންނެވީ ސަލާމުގައެވެ.
މި ޖަލްސާގައި ނިންމާފައިވާ ނިންމުންތައް ތިރީގައި މިވަނީއެވެ.
- 2024 ޖޫން 15 ވަނަ ދުވަހަކީ، 1445 ވަނަ އަހަރުގެ ހިޖުރީ ކަލަންޑަރަށް އައި ބަދަލާއި ގުޅިގެން ޙައްޖު ދުވަސްކަމަށްވާތީ ބައި-އިލެކްޝަންތައް ބާއްވާނެ ތާރީޚެއް އަލުން ކަނޑައެޅުން.
މ.މުލަކު ކައުންސިލްގެ އަންހެން މެންބަރު، ދ.ކުޑަހުވަދޫ ކައުންސިލްގެ ރައީސް އަދި ލ.ގަމު ކައުންސިލްގެ މެންބަރު އިންތިޚާބު ކުރުމަށް ބައި-އިލެކްޝަން ބޭއްވުމަށް ހަމަޖެހިފައިވާ 2024 ޖޫން 15 ވަނަ ދުވަހަކީ، 1445 ވަނަ އަހަރުގެ ހިޖުރީ ކަލަންޑަރަށް އައި ބަދަލާއި ގުޅިގެން ޙައްޖު ދުވަސްކަމަށްވާތީ، ބައި-އިލެކްޝަންގެ އިންތިޒާމްތައް ތިރީގައި ދަންނަވާފައިއެވާ ގޮތުގެމަތިން ހަމަޖެއްސުމަށް އިންތިޚާބާ ގުޅިގެން ބޭއްވެވި 477 ވަނަ ޚާއްޞަ ޖަލްސާގައިވަނީ ނިންމަވާފައެވެ.
· އިންތިޚާބު ބާއްވާނެ ތާރީޚާއި ގަޑި: 2024 ޖޫން 14 ވާ ހުކުރު ދުވަހުގެ 14:00 އިން 20:00 އަށް.
· 2024 ޖޫން 9 ވަނަ ދުވަހު ރީ-ރަޖިސްޓްރޭޝަނަށް ފުރުޞަތު ހުޅުވާލުން.
· 2024 ޖޫން 10 ގައި ވޯޓަރސް ލިސްޓުގައި ސޮއި ކުރުމުގެ ފުރުޞަތު ހުޅުވާލުން.
· 2024 ޖޫން 14 ވަނަ ދުވަހަށް 18 އަހަރު ފުރޭ އެއްވެސް މީހަކު ވޯޓަރސް ލިސްޓުގައި ނެތުމާއެކު ވޯޓަރސް ލިސްޓަށް އެއްވެސް ބަދަލެއް ނާންނާނެތީ ވޯޓަރސް ލިސްޓު މިހާރުވެސް އޮތްގޮތަށް ބޭއްވުން.
އިސްވެ ބުނެވުނު ކަންކަން ކުރުމުގައި ޢާންމުކޮށް ކުރަންޖެހޭ އިޢުލާންތައް މިއަދު ޢާންމު ކުރުމަށާއި، މީގެއިތުރުން މިއައި ބަދަލުގެ މަޢުލޫމާތުތައް ކެންޑިޑޭޓުންނަށާއި، ސިޔާސީ ޕާޓީތަކަށާއި ކަމާގުޅުންހުރި ފަރާތްތަކާ ޙިއްޞާ ކުރެވުނުކަން ކަށަވަރު ކުރުމަށްވެސް އިންތިޚާބާ ގުޅިގެން ބޭއްވެވި 477 ވަނަ ޚާއްޞަ ޖަލްސާގައިވަނީ ނިންމަވާފައެވެ.
މި ބަދަލާއި ގުޅިގެން ޙައްޖު ދުވަހާއި ޢީދު ދުވަސް އިލެކްޝަންސް ކޮމިޝަން ބަންދުކުރެވޭނެގޮތަކަށް އިދާރީ އިންތިޒާމްތައް ހަމަޖައްސައިގެން ކުރިއަށް ގެންދިއުމަށްވެސް އިންތިޚާބާ ގުޅިގެން ބޭއްވެވި 477 ވަނަ ޚާއްޞަ ޖަލްސާގައިވަނީ ނިންމަވާފައެވެ.
ޖަލްސާއާއި ގުޅުންހުރި ލިޔުންތައް
ޖަލްސާގެ ހާޟިރީ
