އޭޝިއަން އެސޯސިއޭޝަން އޮފް އިލެކްޝަން އޮތޯރިޓީސް (އޭއޭއީއޭ) ގެ 2026 ވަނަ އަހަރުގެ ޖެނެރަލް އެސެމްބްލީގައި އިލެކްޝަންސް ކޮމިޝަނުން ބައިވެރިވެއްޖެ
2026 އޮކްޓޫބަރު 14 އިން 17 އަށް ކުރިއަށްގެންދެވުނު އޭޝިއަން އެސޯސިއޭޝަން އޮފް އިލެކްޝަން އޮތޯރިޓީސް (އޭއޭއީއޭ) ގެ ޖެނެރަލް އެސެމްބްލީގައި އިލެކްޝަންސް ކޮމިޝަންގެ ފަރާތުން ބައިވެރިވެއްޖެއެވެ. ފިލިޕީންސްގެ ކޮމިޝަން އޮން އިލެކްޝަންސް އާއި އޭއޭއީއޭ ގެ އިދާރާ އިން އިންތިޒާމުކޮށްގެން، ފިލިޕީންސްގެ ވެރިރަށް މެނިލާގައި ކުރިއަށްގެންދެވުނު މި ބައްދަލުވުމުގައި އިލެކްޝަންސް ކޮމިޝަނުގެ ފަރާތުން ބައިވެރިވެވަޑައިގެންނެވީ ކޮމިޝަނުގެ ރައީސް މުޙައްމަދު ޝަކީލް އާއި ކޮމިޝަނުގެ މެންބަރު ޙަސަން ޒަކަރިއްޔާއެވެ.
އޭޝިއަން އެސޯސިއޭޝަން އޮފް އިލެކްޝަން އޮތޯރިޓީސް (އޭއޭއީއޭ) އަކީ، އޭޝިއާ-ޕެސިފިކް ސަރަޙައްދުގައި މިނިވަން، އިންސާފުވެރި އަދި ދެފުށް ފެންނަ އިންތިޚާބީ ނިޒާމެއް ޤާއިމު ކުރުމަށް މަސައްކަތްކުރާ ސަރަޙައްދީ ޖަމްޢިއްޔާއެކެވެ. 1998 ވަނަ އަހަރު އުފެދުނު މި ޖަމްޢިއްޔާގައި 20 ޤައުމެއްގެ އިންތިޚާބީ އިދާރާ ހިމެނެއެވެ. މި ޖަމްޢިއްޔާގެ މައިގަނޑު މަޤްޞަދުތަކުގެ ތެރޭގައި، މެންބަރު ޤައުމުތަކުގެ އިންތިޚާބީ އިދާރާތައް ހަރުދަނާކުރުމާއި، އެ އިދާރާތަކުގެ މުވައްޒަފުންގެ ފަންނީ ޤާބިލުކަން އިތުރުކުރުމުގެ އިތުރުން، އިންތިޚާބުތަކުގައި ރައްޔިތުންގެ ބައިވެރިވުން އިތުރުކުރުން ހިމެނެއެވެ. މި ޖަމްޢިއްޔާގެ އެންމެ މަތީ ސިޔާސަތުތަކާއި ނިންމުންތައް ނިންމަނީ، ކޮންމެ ދެ އަހަރަކުން އެއްއަހަރު ބާއްވާ އެ ޖަމްޢިއްޔާގެ ޖެނެރަލް އެސެމްބްލީގައެވެ.
2026ވަނަ އަހަރުގެ އޮކްޓޫބަރު މަހުގެ 17 ވަނަ ދުވަހު ބޭއްވުނު މި ޖެނެރަލް އެސެމްބްލީގައި، 10 އިންތިޚާބީ އިދާރާއަކުން 27 އިސް ވެރިން ބައިވެރިވެވަޑައިގެންނެވިއެވެ. މި އެސެމްބްލީގައި ޖަމްޢިއްޔާގެ ރިޔާސަތު ވަނީ ފިލިޕީންސްގެ ކޮމިޝަން އޮން އިލެކްޝަންސް (ކޮމެލެކް) އާ ރަސްމީކޮށް ޙަވާލުކުރެވިފައެވެ. މީގެ އިތުރުން، ޖަމްޢިއްޔާގެ ވައިސް ޗެއާރޕާސަން ކަނޑައެޅުމާއި، ދާއިމީ ސެކްރެޓޭރިއަޓް ޤާއިމުކުރާނެ ހެޑްކުއާޓާސްއަކާ ގުޅޭގޮތުން ފުޅާ ދާއިރާއެއްގައި މަޝްވަރާކުރެވި، މުހިއްމު ނިންމުންތަކެއް ނިންމާފައިވެއެވެ.
މި ޖެނެރަލް އެސެމްބްލީގެ ތެރެއިން، އޭއޭއީއޭ (AAEA) ގެ ބޯޑު މެންބަރުކަމަށް އެދި ހުށަހެޅި ހުށަހެޅުމާ ގުޅިގެން، މި ކޮމިޝަން ވަނީ ރަސްމީކޮށް ބޯޑު މެންބަރެއްގެ ގޮތުގައި އައްޔަންކުރެވިފައެވެ. ބޯޑު މެންބަރަޔަކަށް އައްޔަންވުމުން، އެސޯސިއޭޝަންގެ ހިންގުމުގައި ބައިވެރިވުމުގެ ފުރުޞަތު ލިބި، ސަރަޙައްދީ އިންތިޚާބީ އެއްބާރުލުމުގައި ކޮމިޝަނުގެ ދައުރު އިތުރަށް ވަރުގަދަވެގެން ދާނެއެވެ.
ބައިނަލްއަޤްވާމީ ބައްދަލުވުންތަކުގައި ބައިވެރިވުމަކީ، ސަރަޙައްދީ އަދި ބައިނަލްއަޤްވާމީ ފެންވަރުގައި އިންތިޚާބީ ދާއިރާގެ އެކި ފަރާތްތަކާއެކު ޢިލްމާއި ތަޖުރިބާ ޙިއްޞާ ކުރުމަށް މި ކޮމިޝަނަށް ލިބޭ މުހިއްމު ފުރުޞަތެކެވެ. މީގެ އިތުރުން، އެކި މުއައްސަސާތަކުގެ މެދުގައި އޮންނަ ގުޅުން ވަރުގަދަ ކުރުމަށާއި، ސިޔާސީ މާލީ ކަންކަން ހަރުދަނާ އުޞޫލަކުން ބެލެހެއްޓުމާއި މަޢުލޫމާތު އޮޅުވާލުމާ ދެކޮޅަށް އެހެން ޤައުމުތަކުން އަޅަމުންދާ ފިޔަވަޅުތަކުގެ ޢަމަލީ ތަޖުރިބާތައް ދެނެގަތުމަށްވެސް މަގު ފަހިވެގެންދިޔައެވެ.