އިންތިޚާބާ ގުޅިގެން ބާއްވާ 487 ވަނަ ޚާއްޞަ ޖަލްސާ

ތަޢާރަފް

މި ޖަލްސާގެ ރިޔާސަތު ބެލެހެއްޓެވީ ކޮމިޝަނުގެ ރައީސް މުޙައްމަދު ޒާހިދެވެ. ޖަލްސާގައި ކޮމިޝަނުގެ 4 މެންބަރުން ބައިވެރިވެ ވަޑައިގެންނެވިއެވެ. އެއީ ކޮމިޝަނުގެ ރައީސް މުޙައްމަދު ޒާހިދު، ކޮމިޝަނުގެ ނައިބު ރައީސް ޢަބްދުއްރަޙްމާން ޞަލާޙް ރަޝީދު، ކޮމިޝަނުގެ މެންބަރު ޙަސަން ޒަކަރިއްޔާ އަދި ކޮމިޝަނުގެ މެންބަރު ޢަބްދުލްޙަސީބު އިސްމާޢީލް އެވެ.

މެންބަރު ޑޮކްޓަރު މުޙައްމަދު ޒާހިރު ހުންނެވީ ޢުމުރާ ޗުއްޓީގައެވެ.

މި ޖަލްސާގައި ނިންމާފައިވާ ނިންމުންތައް ތިރީގައި މިވަނީއެވެ.

1.ޤާނޫނު ނަންބަރު 2025/15 ރައްޔިތުންގެ ޚިޔާލު ހޯދުމުގެ ޢާންމު ވޯޓު ނެގުމުގެ ޤާނޫނު ގެޒެޓު ކުރެއްވުމާ ގުޅިގެން، އެ ޤާނޫނުގެ ދަށުން އިލެކްޝަންސް ކޮމިޝަނުން އެކުލަވާލާފައިވާ ގަވާއިދު ފާސްކުރެއްވުމާގުޅޭ.

ޤާނޫނު ނަންބަރު 2025/15 ރައްޔިތުންގެ ޚިޔާލު ހޯދުމުގެ ޢާންމު ވޯޓު ނެގުމުގެ ޤާނޫނު ގެޒެޓު ކުރެއްވުމާ ގުޅިގެން، އެ ޤާނޫނުގެ ދަށުން އިލެކްޝަންސް ކޮމިޝަނުން އެކުލަވާލާފައިވާ، ރައްޔިތުންގެ ޚިޔާލު ހޯދުމުގެ ޢާންމު ވޯޓު ނެގުމުގެ ގަވާއިދަށް، ކޮމިޝަނުގެ މެންބަރުންނާއި ޑިވިޜަންތަކުގެ ވެރިންނާއެކު 2025 ސެޕްޓެންބަރު 28 ގައި ބޭއްވުނު މަޝްވަރާ ބައްދަލުވުމުގައި، މަޝްވަރާ ކުރައްވައި ގެންނެވި އިޞްލާޙުތަކާއެކު، އެގޮތުގެމަތީން، ރައްޔިތުންގެ ޚިޔާލު ހޯދުމުގެ ޢާންމު ވޯޓު ނެގުމުގެ ގަވާއިދު، އިންތިޚާބާ ގުޅިގެން ބޭއްވި 487 ވަނަ ޚާއްޞަ ޖަލްސާގައިވަނީ ފާސް ކުރައްވާފައެވެ.

މީގެއިތުރުން، އިންތިޚާބުތަކާބެހޭ ޢާންމު ޤާނޫނުގައި ޞައްޙަ އަދި ބާޠިލު ވޯޓު ކަނޑައެޅުމާ ގުޅޭގޮތުންނާއި، ސެކިއުރިޓީ އުރަ ކެނޑުމާ ގުޅޭގޮތުން ވަކިގޮތްތަކެއް ބަޔާންކޮށްފައިވާތީ، އެގޮތުގެމަތީން ޢަމަލުކުރުމަށާއި، އަދި އިސްވެ ދެންނެވުނު ޤާނޫނުގައި ވާ ފަދައިން، މިދެންނެވުނު މާއްދާތައް އިންތިޚާބުތަކާބެހޭ ޢާންމު ގަވާއިދުގައި އެއްހަމަކޮށް، އެގޮތުގެމަތީން ގަވާއިދު އިޞްލާޙުކުރުމަށް، އިންތިޚާބާ ގުޅިގެން ބޭއްވި 487 ވަނަ ޚާއްޞަ ޖަލްސާގައިވަނީ ނިންމަވާފައެވެ.