މި ކޮމިޝަނުގެ ނަންބަރު ((IUL)38-AC/38/2026/31) (07 ޖަނަވަރީ 2026)، ((IUL)38-AC/38/2026/32 (07 ޖަނަވަރީ 2026) އަދި ((IUL)38-AC/38/2026/34) (07 ޖަނަވަރީ 2026) އިޢުލާނާ ޙަވާލާދީ ދަންނަވަމެވެ.

ލޯކަލް ކައުންސިލްތަކުގެ އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބު 2026 ގައި ވޯޓުފޮށި ބެހެއްޓުމަށް ހަމަޖައްސާފައިވާ ރިސޯޓުތަކާއި ސިނާޢީ މަސައްކަތްކުރާ ތަންތަނުގެ ތެރެއިން އެ ރިސޯޓުތަކާއި ސިނާޢީ މަސައްކަތްކުރާ ތަންތަނުގައި ވޯޓުފޮށި ބަހައްޓާނީ އެ މީހަކު ރަށްވެހިވެފައިވާ ރަށް ނޫން ރަށެއްގައި ވޯޓުލުމަށްޓަކައި ރަޖިސްޓަރީވުމަށް އިލެކްޝަންސް ކޮމިޝަނުން ހުޅުވާލާ މުއްދަތުގެ ތެރޭގައި އެއިން ރިސޯޓެއް އަދި ސިނާޢީ މަސައްކަތްކުރާ ތަނެއްގައި ވޯޓުލުމަށް މަދުވެގެން 30 (ތިރީސް) މީހުން ރަޖިސްޓަރީވެފައިވާ ނަމައެވެ. އަދި އިޢުލާނުގައިވާ، ރާއްޖެއިން ބޭރު ޤައުމުތަކުގައި ވޯޓުފޮށި ބަހައްޓާނީ އެގައުމަކަށް ވޯޓުލުމަށް މަދުވެގެން 2000 (ދެހާސް) މީހުން ރަޖިސްޓަރީކޮށް، މަދުވެގެން ކޮންމެވެސް 1 (އެކެއް) ދާއިރާއަކުން 40 (ސާޅީސް) މީހުން ރަޖިސްޓަރީވެފައިވާނަމައެވެ. އެހެންކަމުން، ހަވާލާދީފައިވާ އިޢުލާނުތަކުގައިވާ ރިސޯޓެއް ނުވަތަ ސިނާޢީ މަސައްކަތްކުރާ ތަނެއް ނުވަތަ ރާއްޖެއިން ބޭރު ޤައުމެއްގައި ވޯޓުލުމަށް، ދެންނެވިފައިވާ އަދަދަށް ރަޖިސްޓަރީ ކޮށްފައިނުވާނަމަ، އެ ތަންތަނުގައި ބެހެއްޓުމަށް ހަމަޖައްސާފައިވާ ވޯޓުފޮށި ނުބަހައްޓާނެ ވާހަކަ ދަންނަވަމެވެ.

އަދި ވޯޓު ފޮށި ނުބަހައްޓަން ނިންމައިފިނަމަ، އެ ވޯޓުފޮށްޓަށް ވޯޓުލުމަށް ރަޖިސްޓަރީކުރި މީހުން އެހެން ވޯޓުފޮށްޓަކަށް ރީ-ރަޖިސްޓަރީ ކުރުމަށް މުއްދަތެއް ދެވޭނެއެވެ. މި މުއްދަތުގައި ރަޖިސްޓަރީ ނުކުރާ ފަރާތްތަކުން ވޯޓުލުމަށް ރަޖިސްޓަރީވެފައި އޮންނާނީ އެމީހަކު ރަށްވެހިވެފައިވާ ރަށަކަށް ނުވަތަ ސިޓީއަށެވެ.

ވީމާ، މިކަން ޢާންމުކޮށް އެންގުމަށްޓަކައި އިޢުލާން ކުރީމެވެ.