ތަޢާރަފް

މި ޖަލްސާގެ ރިޔާސަތު ބެލެހެއްޓެވީ ކޮމިޝަނުގެ ރައީސް ފުއާދު ތައުފީޤް އެވެ. މިޖަލްސާގައި ކޮމިޝަނުގެ 5 މެންބަރުން ބައިވެރިވެ ވަޑައިގެންނެވިއެވެ. އެއީ ކޮމިޝަނުގެ ރައީސް ފުއާދު ތައުފީޤް، ނައިބު ރައީސް ޢަލީ ނަޝާޠު، މެންބަރު ޑޮކްޓަރު މުޙައްމަދު ޒާހިރު، މެންބަރު މުޙައްމަދު ޢާޞިފް އަދި މެންބަރު ކޮމިޝަން މެންބަރ ޙަސަން ޒަކަރިއްޔާއެވެ.

މި ޖަލްސާގައި ނިންމާފައިވާ ނިންމުންތައް ތިރީގައި މިވަނީއެވެ.

1. ކޮމިޝަނުގެ ޚަރަދުތައް ކުޑަކުރުމަށްޓަކައި 2024 ޖުލައި 10 ވީ ބުދަ ދުވަހު ކަނޑައެޅުއްވި ސިޔާސަތުތަކާގުޅޭ.

ކޮމިޝަނުގެ ޚަރަދުތައް ކުޑަކުރުމަށްޓަކައި ރައީސުލްޖުމްހޫރިއްޔާގެ އޮފީސް ނަންބަރު:1-POL(PRA)/38/2024/10 ސިޓީއާ ގުޅިގެން، 2024 ޖުލައި 10 ވަނަ ދުވަހު ބޭއްވި ނުރަސްމީ ބައްދަލުވުމުގައި ކޮމިޝަނުން ކަނޑައަޅުއްވާފައިވާ ތިރީގައި މި ދަންނަވާ ސިޔާސަތުތައް،  ކޮމިޝަނުގެ 837 ވަނަ ޢާންމު ޖަލްސާގައި ފާސްކުރައްވާފައެވެ.

ކޮމިޝަނުން ކަނޑައަޅުއްވާފައިވާ ސިޔާސަތުތައް 

• ޤާނޫނާ އެއްގޮތްވާ ގޮތުގެމަތީން ބާއްވަންޖެހޭ އިންތިޚާބަކާ ގުޅިގެން ނޫންގޮތަކަށް، އިތުރުގަޑީގައި މަަސައްކަތް ނުކުރުން.
• ކޮމިޝަނުގެ ބަޖެޓުން ހުރިހާ ޚަރަދެއް ހިނގާނޭހެން ޙަފްލާތައް ބޭއްވުން މިވަގުތަށް ހުއްޓާލުން.
• އިންތިޚާބު ބާއްވާ ޤައުމަކުން ޚަރަދުދޭގޮތަށް ދަޢުވަތު ދޭ އޮބްޒަވޭޝަން ދަތުރުތަކާއި، އިލެކްޝަންސް ކޮމިޝަން ބައިވެރިވެފައިވާ އިންތިޚާބީ އިދާރާތަކާގުޅޭ ބައިނަލްއަޤްވާމީ ޖަމްޢިއްޔާ ޖަމާޢަތްތަކުން އިންތިޒާމުކުރާ ބައްދަލުވުންތަކުގައި ބައިވެރިވުން ފިޔަވައި، ކޮމިޝަނުގެ ބަޖެޓުން ހުރިހާ ޚަރަދެއް ހިނގާނޭހެން ކުރާ ދަތުރުތައް ހުއްޓާލުން.
• ކޮންޓްރެކްޓް މުވައްޒަފުންގެ ޢަދަދު މަދުކުރުން.
• ޔޫޓިލިޓީ ބިލްތައް ކުޑަކުރުމަށްޓަކައި، އިތުރަށް ފިޔަވަޅުތަކެއް އެޅުން.
  
  

2. އިލެކްޝަންސް ކޮމިޝަނުގެ މަޤާމުތަކުގެ ޝަރުތުތަކާއި މިންގަނޑުތަކުގެ އުޞޫލު ފާސްކުރުމާ ގުޅޭ.

އިލެކްޝަންސް ކޮމިޝަނުގެ މަޤާމުތަކުގެ ޝަރުތުތަކާއި މިންގަނޑުތަކުގެ އުޞޫލު  (އިސްދާރު 03) ގެ، ހިއުމަން ރިސޯސް މެނޭޖްމަންޓް ސެކްޝަނުން ހުށަހަޅުއްވާފައިވާ ގޮތައް ފާސްކުރުމަށް، ކޮމިޝަނުގެ 837 ވަނަ ޢާންމު ޖަލްސާގައި ވަނީ ނިންމަވާފައެވެ.

3. ސަޕޯޓް ސަރވިސް ކެޓަގަރީގެ މަޤާމުތަކަށް ކުރިމަތިލާ ފަރާތްތަކުގެ އުމުރުފުރާ ބަދަލުކުރުމާ ގުޅޭ.

ސަޕޯޓް ސަރވިސް ކެޓަގަރީގެ މަޤާމުތަކަށް ކުރިމަތިލާ ފަރާތްތަކުގެ ޢުމުރުފުރާގެ ގޮތުގައި "18 އަހަރާއި 60 އަހަަަރާ ދެމެދު" މިފަދައިން ބަދަލުކުރުމަށާއި، އަދި އިތުރު ޝަރުޓެއްގެ ގޮތުގައި ސިއްޙީ ގޮތުން ދުޅަހެޔޮ ފަރާތެއް ކަމުގައިވުން" މިފަދައިން ހިމެނުމަށާއި، ކޮމިޝަނުގެ 837 ވަނަ ޢާންމު ޖަލްސާގައި ވަނީ ނިންމަވާފައެވެ.

މި ނިންމެވުމާއި ގުޅިގެން، މި ބަދަލު ކޮމިޝަނުގެ ގަވައިދުގައި ހިމެނުމަށް، ކޮމިޝަނުގެ 837 ވަނަ ޢާންމު ޖަލްސާގައި ވަނީ ނިންމަވާފައެވެ.

4. ޕްރޮސެކިއުޓަރ ޖެނެރަލްސް އޮފީހާއެކު ބޭއްވުނު ބައްދަލުވުމުގައި ފާހަގަކޮށްފައިވާ ކަންކަމާ ގުޅޭ.

ޤާނޫނު ނަންބަރު 11/2008 (އިންތިޚާބުތަކާބެހޭ ޢާންމު ޤާނޫނު) 73 ވަނަ މާއްދާގެ (ހ) ގައި ބަޔާންކޮށްފައިވާ ގޮތުގެމަތީން، އިންތިޚާބެއް ބާއްވާ ތާރީޚުން ފެށިގެން 1 (އެކެއް) މަސްދުވަހުގެ ތެރޭގައި އެ ކެންޑިޑޭޓަކު އިންތިޚާބާގުޅޭ މާލީ ކަންކަމާ ބެހޭ މަޢުލޫމާތު ހިމެނޭހެން ތައްޔާރުކުރާ މާލީ ބަޔާނެއް ކޮމިޝަނަށް ހުށަހަޅާންވާނޭ ކަމަށް ބަޔާންކޮށްފައިވާތީއާއި، ރައްޔިތުންގެ މަޖިލީހުގެ އިންތިޚާބު 2024 ގައި ވާދަކޮށްފައިވާ ކެންޑިޑޭޓުން ކޮމިޝަނަށް ހުށަހަޅުއްވާފައިވާ މާލީ ބަޔާންތައް ދިރާސާކޮށް، އެ ދިރާސާތަކާއެކު، ޕްރޮސެކިއުޓަރ ޖެނެރަލްގެ އޮފީހާއެކު ބޭއްވެވި މަޝްވަރާތަކަށް ރިޢާޔަތްކޮށް، އަދި ރައްޔިތުންގެ މަޖިލީހުގެ އިންތިޚާބު 2024 ގައި ވާދަކޮށްފައިވާ ކެންޑިޑޭޓުންގެ ތެރެއިން، މިކޮމިޝަނަށް މާލީ ބަޔާން އެއްވެސް ވަރަކަށް ހުށަހަޅުއްވާފައި ނުވާ 33 ފަރާތެއްގެ މައްސަލަ ދަޢުވާކުރުމަށްޓަކައި ޕްރޮސެކިއުޓަރ ޖެނެރަލްގެ އޮފީހަށް ފޮނުވުމަށް، މިޝަނުގެ 837 ވަނަ ޢާންމު ޖަލްސާގައި ވަނީ ނިންމަވާފައެވެ. 

މި ނިންމެވުމާ ގުޅިގެން، އިސްވެ ދެންނެވުނު ފަރާތްތަކަށް ދަޢުވާކުރެއްވުމަށްއެދި ޕްރޮސެކިއުޓަރ ޖެނެރަލްގެ އޮފީހަށް ކަނޑައެޅިފައިވާ އުޞޫލާއެއްގޮތަށް ޢަމަލުކުރެއްވުމާއި، މިކަމަށް އުޞޫލެއް ނެތްކަމުގައިވާނަމަ، އުޞޫލެއް ފަރުވާކޮށް ކޮމިޝަނަށް ހުށަހެޅުއްވުމަށް، ކޮމިޝަނުގެ 837 ވަނަ ޢާންމު ޖަލްސާގައި ވަނީ ނިންމަވާފައެވެ.

5. ހިއުމަން ރައިޓްސް ކޮމިޝަން އޮފް ދަ މޯލްޑިވްސް އާއި ހޯޕް ފޯ ވިމެން އާ ގުޅިގެން "އިންޓަރ ސްކޫލް ހިއުމަން ރައިޓްސް ކުއިޒް 2024" އާ ގުޅޭ.

ހިއުމަން ރައިޓްސް ކޮމިޝަން އޮފް ދަ މޯލްޑިވްސް އާއި ހޯޕް ފޯ ވިމެން އާ ގުޅިގެން އިންސާނީ ޙައްޤުތަކާއި މެދު ދަރިވަރުންގެ ހޭލުންތެރިކަން އިތުރުކުރުމާއި، މަޢުލޫމާތު މުއްސަނދިކުރުމާއި، ބެލެނިވެރިންނާއި، މުދައްރިސުން އަދި މުޖުތަމަޢުގައި މިފަދަ މަޢުލޫމާތުތައް ފޯރުކޮށްދީ ހޭލުންތެރިކަން އިތުރުކުރުމުގެ މަޤްޞަދުގައި 2024 ސެޕްޓެންބަރ 27 އިން 2024 އޮކްޓޫބަރު 3 އަށް ކުރިއަށްގެންދާ "އިންޓަރ ސްކޫލް ހިއުމަން ރައިޓްސް ކުއިޒް 2024" ކުއިޒްގައި މިކޮމިޝަނުގެ ބައިވެރިވުމަށް، ކޮމިޝަނުގެ 837 ވަނަ ޢާންމު ޖަލްސާގައި ވަނީ ނިންމަވާފައެވެ.

މި ނިންމެވުމާ ގުޅިގެން، "އިންޓަރ ސްކޫލް ހިއުމަން ރައިޓްސް ކުއިޒް 2024" އަށް، މިކޮމިޝަނަށް އެއްވެސް ވަރެއްގެ މާލީ އެހީތެރިކަމެއް ވެދެވެން ނެތްކަމަށް ދަންނަވައި ދެއްވުމަށާއި، އެހެންނަމަވެސް، ހިއުމަން ރައިޓްސް ކޮމިޝަން އޮފް ދަ މޯލްޑިވްސް އާއި ހޯޕް ފޯ ވިމެން ބޭނުންވާ ފަންނީ އެހީތެރިކަމާއި އިދާރީގޮތުން ހަމަޖެއްސެވެން ހުރި އެހެނިހެން އިންތިޒާމުތަކާއި އެހީތެރިކަން އެ ފަރާތްތަކަށް ފޯރުކޮށްދިނުމަށާއި، އެހެންނަމަވެސް، އެހީތެރިކަން ފޯރުކޮށްދޭއިރު އިލެކްޝަންސް ކޮމިޝަނުގެ އިންޓެގްރިޓީ ނުގެއްލޭނެ ފަދައަކުން ޢަމަލުކުރުމަށް ޚާއްޞަ ސަމާލުކަމެއް ދިނުމަށްވެސް، ކޮމިޝަނުގެ 837 ވަނަ ޢާންމު ޖަލްސާގައި ވަނީ ނިންމަވާފައެވެ.

6. ވޯޓުލާ މީހުންގެ ދުވަހަށް ޚާއްޞަކޮށްގެން ހިންގުމަށް ރާވާ ހަރަކާތްތަކާގުޅޭ ޕްލޭން ފާސްކުރުމާގުޅޭ.

ވޯޓަރސް ޑޭ ފާހަގަ ކުރުމަށްޓަކައި، ސިވިކް އެޑިއުކޭޝަން އެންޑް ޓްރެއިނިންގ ސެކްޝަނުން 2024 ޖުލައި 16 ގައި ހުށަހަޅުއްވާފައިވާ "ވޯޓުލާ މީހުންގެ ދުވަހަށް ޚާއްޞަކޮށްގެން ހިންގުމަށް ރާވާ ހަރަކާތްތަކާގުޅޭ ޕްލޭން"، ކޮމިޝަނުގެ 827 ވަނަ ޢާންމު ޖަލްސާގައި ވަނީ ފާސް ކުރައްވާފައެވެ. 

7. ރައްޔިތުންގެ މަޖިލީހުގެ އިންތިޚާބު 2024 ގެ އިންތިޚާބު ރިޕޯޓު ފާސްކުރުމާ ގުޅޭ.

ޕްލޭނިންގ، ޕޮލިސީ އެންޑް ރިސަރޗް ސެކްޝަނުން ތައްޔާރުކޮށް ކޮމިޝަނަށް ހުށަހަޅުއްވާފައިވާ، ރައްޔިތުންގެ މަޖިލީހުގެ އިންތިޚާބު 2024 ގެ އިންތިޚާބު ރިޕޯޓު، ކޮމިޝަނުގެ 837 ވަނަ ޢާންމު ޖަލްސާގައި ވަނީ ފާސްކުރައްވާފައެވެ. 

8. ގްރީން ޕާޓީ އޮފް މޯލްޑިވްސް އުފެއްދުމަށްދީފައިވާ ހުއްދަ ބާޠިލުކުރުމާ ގުޅޭ.

ގއ. ކޮލަމާފުށި، އޯޝަންރީޑް، މުޙައްމަދު ޢަޒީމް (A047361) ގްރީން ޕާޓީ އޮފް މޯލްޑިވްސް އުފެއްދުމަށް ދީފައިވާ ހުއްދައާ ގުޅިގެން، ޤާނޫނު ނަންބަރު 2013/4 (ސިޔާސީ ޕާޓީގެ ޤާނޫނު) ގެ 12 ވަނަ މާއްދާގައި ވާ ގޮތުގެމަތިން "ގްރީން ޕާޓީ އޮފް މޯލްޑިވްސް" ގެ ނަމުގައި ސިޔާސީ ޕާޓީއެއް އުފެއްދުމަށް ބޭނުންވާ 3000 (ތިންހާސް) މީހުންގެ ސޮއި ހޯދުމަށާއި ޕާޓީ އުފެއްދުމުގެ މަސައްކަތް ކުރިއަށް ގެންދިއުމަށް ދީފައިވާ މުއްދަތުގައި، އެފަރާތުން އެއްވެސް ފޯމެއް ކޮމިޝަނަށް ހުށަހަޅާފައި ނުވާކަމަށް ރަޖިސްޓްރޭޝަން ސެކްޝަނުން މަޢުލޫމާތު ދީފައިވާތީ، މިކަމާ ގުޅިގެން ލީގަލް އެންޑް ޕޮލިޓިކަލް ޕާޓީ ރެގިއުލޭޝަން ސެކްޝަނުން ކޮމިޝަނަށް ހުށަހަޅުއްވާފައިވާ ޤާނޫނީލަފާއަށް ރިޢާޔަތްކޮށް، ގއ. ކޮލަމާފުށި، އޯޝަންރީޑް، މުޙައްމަދު ޢަޒީމް (A047361) ގްރީން ޕާޓީ އޮފް މޯލްޑިވްސް އުފެއްދުމަށް ދީފައިވާ ހުއްދަ ބާޠިލުކުރުމަށް، ކޮމިޝަނުގެ 837 ވަނަ ޢާންމު ޖަލްސާގައި ވަނީ ނިންމަވާފައެވެ.

9. މ.މާވެޔޮވިލާ، ޙަސަން ޒަމީލް ސިވިލް ކޯޓަށް ހުށަހެޅި މައްސަލަ އަނބުރާ ގެންގޮސްފައިވާކަމަށް ސިވިލް ކޯޓުގެ ނަންބަރު:668-CVC-2024 ޤަޟިއްޔާއިން ޙުކުމްކޮށްފައިވާތީ އެކަމާ ގުޅޭ.

މި ކޮމިޝަނުގެ ނަންބަރު:38-CB./INDIV/2023/2223 ސިޓީ އިން، ޙަސަން ޒަމީލް އާއި، ޙަސަން ޒަމީލްގެ ރަސްމީ އިންތިޚާބީ އޭޖެންޓް ޖޫރިމަނާކުރުމަށް ނިންމެވި ނިންމެވުން، ކޮމިޝަނުގެ 834 ވަނަ ޢާންމު ޖަލްސާގައި މުރާޖަޢާ ކުރައްވާފައިވާތީ، މި ކޮމިޝަނުގެ މައްޗަށް ހުށަހަޅާފައިވާ ޖުޑީޝަލް ރިވިއުގެ މައްސަލަ އަނބުރާ ގެނައުމަށް މ.މާވެޔޮވިލާ، ޙަސަން ޒަމީލް ސިވިސް ކޯޓުގައި އެދިފައިވާތީ، އެ މައްސަލަ އަނބުރާ ގެންގޮސްފައިވާ ކަމަށް ސިވިލް ކޯޓުގެ ނަންބަރު:668-CVC-2024 ޤަޟިއްޔާއިން ހުކުމްކުރައްވާފައިވާތީ، އެކަމުގެ މަޢުލޫމާތު ކޮމިޝަނުގެ 837 ވަނަ ޢާންމު ޖަލްސާގައި ވަނީ ކޮމިޝަނާ ޙިއްޞާ ކޮށްފައެވެ. 

ދަންނަވަމެވެ. މި މައްސަލައާ ގުޅޭ އެންމެހާ ލިޔެކިޔުންތައް ކޮމިޝަނުގެ އިދާރީ ލިޔެކިޔުންތަކުން އަދާ ހަމަކުރެއްވުމަށްވެސް، ކޮމިޝަނުގެ 837 ވަނަ ޢާންމު ޖަލްސާގައި ވަނީ ނިންމަވާފައެވެ.

10. އިލެކްޝަންސް ކޮމިޝަން އިދާރީގޮތުން ހިންގުމަށްޓަކައި، "ސެކްރެޓަރީ ޖެނެރަލްގެ އިރުޝާދު" ގެ ނަމުގައި އޮޕަރޭޓަރިންގ ޑައިރެކްޓިވް ފާސްކުރުމާ ގުޅޭ.

އިލެކްޝަންސް ކޮމިޝަން އިދާރީގޮތުން ހިންގުމަށްޓަކައި "ސެކްރެޓަރީ ޖެނެރަލްގެ އިރުޝާދު" ގެ ނަމުގައި އޮޕަރޭޓިންގ ޑައިރެކްޓިވް ފާސްކުރުމަށާއި، މި ޑައިރެކްޓިވް ގެ ފުރަތަމަ އިރުޝާދެއްގެ ގޮތުން، މިކަން ކުރެވޭނެ ޑިޖިޓަލްގޮތެއް، 30 ދުވަހުގެ ތެރޭގައި ހޯދުމަށްފަހު ކޮމިޝަނަށް ހުށަހެޅުއްވުމަށް، ކޮމިޝަނުގެ 837 ވަނަ ޢާންމު ޖަލްސާގައި ވަނީ ނިންމަވާފައެވެ.

11. 2024 ޖަނަވަރީ 24 ގައި، އިންޑިއާދެ ނިއުދިއްލީގައި ބޭއްވި އެސޯސިއޭޝަން ފޯ އޭޝިއަން އިލެކްޝަންސް އޮތޯރިޓީސް (އޭ.އޭ.އީ.އޭ) ގެ އެގްޒެކެޓިވް ބޯޑް މީޓިންގ ގައި ފާސްކޮށްފައިވާ ކަންކަމާއި ގުޅޭ.

2024 ޖަނަވަރީ 24 ގައި، އިންޑިއާގެ ނިއުދިއްލީގައި ބޭއްވި އެސޯސިއޭޝަން ފޯ އޭޝިއަން އިލެކްޝަންސް އޮތޯރިޓީސް (އޭ.އޭ.އީ.އޭ) ގެ އެގްޒެކްޓިވް ބޯޑް މީޓިންގ ގައި ފާސްކޮށްފައިވާ ކަންކަން އެންޑޯސްކުރުމަށް، ކޮމިޝަނުގެ 837 ވަނަ ޢާންމު ޖަލްސާގައިވަނީ ނިންމަވާފައެވެ.

· އޭ.އޭ.އީ.އޭ އަށް ޤާނޫނީ ޙައިސިއްޔަތު ދިނުން.

· ސެކްރެޓޭރިއެޓް އިންޑިއާގައި ޤާއިމުކުރުން.

· އިންޑިއާއިން ޕްރޮޕޯސް ކުރާ ވެބްސައިޓް އިފްތިތާހުކުރުން.

12. ސެންޓްރަލް އިލެކްޝަންސް ކޮމިޝަން އޮފް ދަ ރިޕަބްލިކް އޮފް އަޒަރުބައިޖާނުން، މިކޮމިޝަނަށް ފޮނުއްވާފައިވާ ދަޢުވަތާ ގުޅޭ.

ސެންޓްރަލް އިލެކްޝަންސް ކޮމިޝަން އޮފް ދަ ރިޕަބްލިކް އޮފް އަޒަރުބައިޖާން 2024 ސެޕްޓެންބަރ 1 ގައި ކުރިއަށްގެންދާ އާރލީ ރިޕަބްލިކް ޕާލިމެންޓަރީ އިލެކްޝަން އޮބްޒަވޭޝަން އޮބްޒާވްކުރެއްވުމަށް އެދިވަޑައިގެން މިކޮމިޝަނަށް ފޮނުއްވާފައިވާ ދަޢުވަތާ ގުޅިގެން، ކޮމިޝަނުގެ ފަރާތުން ކޮމިޝަނުގެ ނައިބު ރައީސް ޢަލީ ނަޝާޠު އަދި ކޮމިޝަނުގެ މެންބަރ ޙަސަން ޒަކަރިއްޔާ އަޒަރުބައިޖާނަށް ވަޑައިގަތުމަށް، ކޮމިޝަނުގެ 837 ވަނަ ޢާންމު ޖަލްސާގައިވަނީ ނިންމަވާފައެވެ.

މިނިންމެވުމާ ގުޅިގެން، އިތުރު ޖާގައަކަށް އެ ކޮމިޝަނަށް ލިޔުއްވުމަށާއި، އަދި އިތުރު ޖާގައެއް ލިބޭކަމުގައިވާނަމަ، އިދާރީގޮތުން ދާނެ މުވައްޒަފަކު ކަނޑައެޅުއްވުމަށް، ކޮމިޝަނުގެ 837 ވަނަ ޢާންމު ޖަލްސާގައިވަނީ ނިންމަވާފައެވެ.

13. އިންޓަރނަލް އޮޑިޓަރ ޝަހުލާ ރުޝްދީގެ 2023 ވަނަ އަހަރުގެ އެޕްރައިޒަލް ފުރުމާގުޅޭ.

އިންޓަރނަލް އޮޑިޓަރ ޝަހުލާ ރުޝްދީގެ 2023 ވަނަ އަހަރުގެ އެޕްރައިޒަލް ކޮމިޝަނުގެ 837 ވަނަ ޢާންމު ޖަލްސާގައިވަނީ ފުރިހަމަކުރައްވާފައެވެ. 

މިގޮތުން، ކޮމިޝަނުގެ މެންބަރުން ދެއްވާފައިވާ ޖުމްލަ މާރކްސްގެ އެވްރެޖް އަދި ކޮމިޝަނުގެ މެންބަރުންގެ ވިދާޅުވެފައިވާ އިރުޝާދުތައް އިދާރީގޮތުން ކޮމިޝަނަރސް ބިއުރޯއިން ފުރިހަމަކުރެއްވުމަށް ވެސް، ކޮމިޝަނުގެ 837 ވަނަ ޢާންމު ޖަލްސާގައި ވަނީ ނިންމަވާފައެވެ. 

14. އިންތިޚާބުތަކާ ބެހޭ ވަކިވަކި ޤާނޫނުތައް، އެއް ޤާނޫނަކުން ފެންނާނެހެން ޤާނޫނެއް ތައްޔާރުކުރެއްވުމާއި، ފެންނަ ނުފެންނަ ވޯޓެއް ނުވަތަ ޚިޔާލުހޯދުމުގެ ވޯޓެއްގައި ޢަމަކުރާނޭގޮތުގެ ގަވައިދެއް ތައްޔާރުކުރެއްވުމާގުޅޭ.

އިންތިޚާބުތަކާ ބެހޭ ވަކިވަކި ޤާނޫނުތައް، އެއް ޤާނޫނަކުން ފެންނާނެހެން ޤާނޫނެއް ތައްޔާރުކުރެއްވުމަށާއި، މިގޮތުން މި ޤާނޫނުގެ ދެލިކޮޕީއެއް ތައްޔާރު ކުރެއްވުމަށްފަހު ކޮމިޝަނަށް ހުށަހެޅުއްވުމަށާއި، އެއަށްފަހު ކޮމިޝަނުގެ ލަފާގެ މަތީން ބަންޑާރަ ނައިބުގެ އަރިހަށް ފޮނުވުމަށްޓަކައި އިދާރީ ގޮތުން ފުރިހަމަކުރަންޖެހޭ ކަންކަން ފުރިހަމަކުރެއްވުމަށް، ކޮމިޝަނުގެ 837 ވަނަ ޢާންމު ޖަލްސާގައި ވަނީ ނިންމަވާފައެވެ.

އަދި، ފެންނަ ނުފެންނަ ވޯޓެއް ނުވަތަ ޚިޔާލުހޯދުމުގެ ވޯޓެއް ކައިރި މުސްތަޤްބަލެއްގައި ބޭއްވޭ ކަމުގައި އަޑުތައް އަރާފައިވާތީ، މިކަމަށް ދުރާތާ ތައްޔާރުވުމުގެ ގޮތުގެ ފެންނަ ނުފެންނަ ވޯޓެއް ނުވަތަ ޚިޔާލުހޯދުމުގެ ވޯޓެއްގައި ޢަމަކުރާނޭގޮތުގެ ގަވައިދެއް ކޮމިޝަނުގެ ލީގަލް ފާރމުގެ މަޝްވަރާގެ އަލީގައި ތައްޔާރުކޮށް ކޮމިޝަނަށް ހުށަހެޅުއްވުމަށް، ކޮމިޝަނުގެ 837 ވަނަ ޢާންމު ޖަލްސާގައި ވަނީ ނިންމަވާފައެވެ.

15. 2024 ޖޫން 14 ގެ ބައި އިލެކްޝަންގެ ވޯޓަރސް ލިސްޓު އެކުލަވާލުމުގައި އިހުމާލުވި މުވައްޒަފުންނަށް ފިޔަވަޅު އެޅުމާއިގުޅޭ.

2024 ޖޫން 14 ވަނަ ދުވަހު ބޭއްވުނު ބައި-އިލެކްޝަންގެ ވޯޓުލުމުގެ ޙައްގު ލިބިގެންވާ މީހުންގެ ލިސްޓް އެކުލަވާލުމުގައި އިދާރީގޮތުން ބައެއް މުވައްޒަފުން އިހުމާލުވެފައިވާކަން ކޮމިޝަނަށް ފާހަގަކުރެއްވުމާއެކު، އެކަމާ ގުޅޭގޮތުން އެކުލަވާލެއްވި ކޮމިޓީގެ ރިޕޯޓަށް ރިޢާޔަތްކޮށް މުވައްޒަފުންނަށް އެޅޭނެ ފިޔަވަޅުތައް ބަޔާންކުރައްވާ ކޮމިޝަނުގެ ސެކްރެޓަރީ ޖެނެރަލް ކޮމިޝަނަށް ހުށަހަޅުއްވާފައިވާ ރިޕޯޓަށް ބައްލަވައި، ގަވައިދު ނަންބަރު 2019/R-2 (އިލެކްޝަންސް ކޮމިޝަނުގެ ގަވައިދު) ގެ ޖަދުވަލް 3 (މުވައްޒަފުންނާމެދު އިޞްލާޙީ ފިޔަވަޅު އެޅުމުގެ އުޞޫލު) ގެ 9.1 ވަނަ މާއްދާގައި ބަޔާންކޮށްފައިވާ ކުށެއް (މުވައްޒަފާ ޙަވާލުކޮށްފައިވާ މަސައްކަތަށް ނުވަތަ ވަޒީފާގެ ޒިންމާއަށް ފަރުވާ ކުޑަވުން)، ކުރިކަން އެނގެން އޮތުމާއެކު އަދި މި މުވައްޒަފަކީ މި މަސައްކަތުގެ ޒިންމާއާ އެންމެ އިސްކޮށް ޙަވާލުކޮށްފައިވާ މުވައްޒަފަށްވާތީ، އިސްވެ ދެންނެވުނު މާއްދާއާ ޙަވާލާދީ ކޮމިޝަނުގެ ގަވައިދުގައި ބަޔާންކޮށްފައިވާ އިޖުރާޢަތުތައް ފުރިހަމަކޮށް، ރަޖިސްޓްރޭޝަން ސެކްޝަން ހިންގެވުމާ ޙަވާލުވެ ހުންނެވި އެ ސެކްޝަންގެ އެސިސްޓެންޓް ޑިރެކްޓަރ އަލީ ޢަބްދުއްރަޙުމާނަށް އަނގަބަހުން ނަޞޭހަތްދިނުމާއެކު އިޞްލާޙުވުމުގެ ފުރުޞަތު ދިނުމަށް، ކޮމިޝަނުގެ 837 ވަނަ ޢާންމު ޖަލްސާގައި ވަނީ ނިންމަވާފައެވެ.

މި ނިންމެވުމާ ގުޅިގެން، 2024 ޖޫން 14 ވަނަ ދުވަހު ބޭއްވުނު ބައި-އިލެކްޝަންގެ ވޯޓުލުމުގެ ޙައްގު ލިބިގެންވާ މީހުންގެ ލިސްޓް އެކުލަވާލުމުގައި އިދާރީގޮތުން ބައެއް މުވައްޒަފުން އިހުމާލުވެފައިވާކަން ކޮމިޝަނަށް ފާހަގަކުރެއްވުމާއެކު، އެކަމާ ގުޅޭގޮތުން އެކުލަވާލެއްވި ކޮމިޓީގެ ރިޕޯޓަށް ރިޢާޔަތްކޮށް މުވައްޒަފުންނަށް އެޅޭނެ ފިޔަވަޅުތައް ބަޔާންކުރައްވާ ކޮމިޝަނުގެ ސެކްރެޓަރީ ޖެނެރަލް ކޮމިޝަނަށް ހުށަހަޅުއްވާފައިވާ ރިޕޯޓަށް ބައްލަވައި، ދެން މިކަމުގައި އިހުމާލުވެފައިވާ އެހެނިހެން އިދާރީ މުވައްޒަފުން ކަމުގައިވާ އެ ސެކްޝަންގެ ސީނިއަރ އޮފިސަރ އިބްރާހީމް ޝާހީން އަދި އޮފިސަރ ނަދީމާ އަބްދުއްރަޙީމަށް، ސެކްރެޓަރީ ޖެނެރަލް އިދާރީ ފިޔަވަޅެއްގެ ގޮތުގައި އަނގަބަހުން ނަޞޭހަތްތެރިވުމަށްވެސް، ކޮމިޝަނުގެ 837 ވަނަ ޢާންމު ޖަލްސާގައި ވަނީ ނިންމަވާފައެވެ.