ތަޢާރަފް

މި ޖަލްސާގެ ރިޔާސަތު ބެލެހެއްޓެވީ ކޮމިޝަނުގެ ނައިބު ރައީސް ޢަލީ ނަޝާޠުއެވެ. މިޖަލްސާގައި ކޮމިޝަނުގެ 4 މެންބަރުން ބައިވެރިވެ ވަޑައިގެންނެވިއެވެ. އެއީ ކޮމިޝަނުގެ ނައިބު ރައީސް ޢަލީ ނަޝާޠު، މެންބަރު ޑޮކްޓަރު މުޙައްމަދު ޒާހިރު، މެންބަރު މުޙައްމަދު ޢާޞިފް އަދި މެންބަރު ޙަސަން ޒަކަރިއްޔާއެވެ.

 

ކޮމިޝަނުގެ ރައީސް ފުއާދު ތައުފީޤް ހުންނެވީ ޗުއްޓީގައެވެ.

 

މި ޖަލްސާގައި ނިންމާފައިވާ ނިންމުންތައް ތިރީގައި މިވަނީއެވެ.

 

1. މިކޮމިޝަނުގެ 03 ވަނަ ފަންގިފިލާ މީޓިންގ ރޫމަށް އައު ޕްރެޖެކްޓަރ އެއް ގަތުމާ ގުޅޭ.

ބަޖެޓު ކުރެވިފައިނުވާ ރިކަރަންޓު ޚަރަދުތަކުގެ ތެރެއިން 5,000/- ރުފިޔާ އަށްވުރެން ބޮޑު ޚަރަދުތަކާއި، ބަޖެޓު ކުރެވިފައިނުވާ ހަރުމުދާ ގަތުމަށް ކޮމިޝަނުގެ ހުއްދައަށް އެދޭ ފޯމުން، އެޑްމިނިސްޓްރޭޝަން އެންޑް ސަޕޯޓް ސަރވިސް ސެކްޝަނުން ހުށަހަޅާފައިވާ އެ ސެކްޝަނުގެ ނަންބަރު:AA/2024/04 ފޯމުގައި، ކޮމިޝަނުގެ 03 ވަނަ ފަންގިވިލާ މީޓިންގ ރޫމްގައި ބޭނުންކުރާ ޕްރޮޖެކްޓަރ ނުސާފުވުމާ ގުޅިގެން، އެ ތަނަށް އައު ޕުރޮޖެކްޓަރެއް ގަތުމުގެ ހުއްދައަށް އެދިފައިވާތީ، އައު ޕްރެޖަކްޓަރެއް 20,000/- ގެ ބަޖެޓެއްގެ ތެރެއިން ގަތުމަށް، ކޮމިޝަނުގެ 840 ވަނަ ޢާންމު ޖަލްސާގައި ވަނީ ނިންމަވާފައެވެ.

 

2. އިންތިޚާބުތަކާބެހޭ ޢާންމު ޤާނޫނުގައި ބަޔާންކޮށްފައިވާ ގޮތުގެމަތިން މާލީ ބަޔާން ހުށަހަޅާފައިނުވާ މީހުންގެ ޖޫރިމަނާކުރުމާ ގުޅޭ.

2023 ވަނަ އަހަރުގެ ރައްޔިތުންގެ މަޖިލީހުގެ ގުރައިދޫ ދާއިރާގެ ބައި-އިލެކްޝަނާއި، 2023 ވަނަ އަހަރުގެ ރިޔާސީ އިންތިޚާބުގައި ވާދަކުރެއްވި ކެންޑިޑޭޓުންގެ ތެރެއިން، އިންތިޚާބުތަކާބެހޭ ޢާންމު ޤާނޫނުގެ 73 ވަނަ މާއްދާގައި ބަޔާންކޮށްފައިވާ ގޮތުގެމަތިން ކޮމިޝަނަށް ހުށަހަޅަންޖެހޭ މާލީ ބަޔާންތައް ކޮމިޝަނަށް ހުށަހަޅާފައިނުވާ ކެންޑިޑޭޓުން ޖޫރިމަނާކޮށްފައިވާތީ އާއި، އޭގެތެރެއިން، 2023 ވަނަ އަހަރުގެ ރިޔާސީ އިންތިޚާބުގައި ވާދަކުރެއްވި ކެންޑިޑޭޓެއް ކަމުގައިވާ، މއ. މާވެޔޮ ވިލާ، ޙަސަން ޒަމީލް އާއި ޙަސަން ޒަމީލްގެ ރަސްމީ އޭޖެންޓް، އިސްވެ ދެންނެވުނު ޤާނޫނުގައި ބަޔާންކޮށްފައިވާ ގޮތުގެމަތީން، ފަހުގެ ތާރީޚެއްގައި ކޮމިޝަނަށް މާލީ ބަޔާނާގުޅޭ ލިޔެކިޔުންތައް ހުށަހެޅުމުންނާއި، މިކަމުގައި ދިމާވެފައިވާ ބައެއް ޤާނޫނީ ކަންކަމުގެ ސަބަބުން މި ކެންޑިޑޭޓުގެ ޖޫރިމަނާ ކޮމިޝަނުން މުރާޖަޢާކޮށް ދެއްވާފައިވާތީ، 2023 ވަނަ އަހަރުގެ ރައްޔިތުންގެ މަޖިލީހުގެ ގުރައިދޫ ދާއިރާގެ ބައި-އިލެކްޝަނާއި، 2023 ވަނަ އަހަރުގެ ރިޔާސީ އިންތިޚާބުގައި ވާދަކުރެއްވި ކެންޑިޑޭޓުންނާ ގުޅިގެން، ކޮމިޝަނުން ޖޫރިމަނާ ކުރައްވާފައިވާ ފަރާތްތަކާމެދު ޢަމަލުކުރާނެގޮތް ތަކަކާއި، މީގެ ތެރެއިން ޖޫރިމަނާގެ ފައިސާ ދައްކާފައިވާ ކެންޑިޑޭޓުންނާ މެދު ޢަމަލުކުރަންވީ ގޮތެއް ހޯއްދެވުމަށްފަހު، އެކަމުގެ ތަފްޞީލްތައް ކޮމިޝަނަށް ހުށަހެޅުމަށް، ކޮމިޝަނުގެ 841 ވަނަ ޢާއްމު ޖަލްސާއިން ނިންމެވިއެވެ.

 

3. ރައްޔިތުންގެ މަޖިލީހުގެ އިންތިޚާބު 2024 ގައި ވާދަކޮށްފައިވާ ކެންޑިޑޭޓުންގެ ތެރެއިން، ކޮމިޝަނަށް ހުށަހަޅަންޖެހޭ މާލީ ބަޔާންތައް ކޮމިޝަނަށް ހުށަހަޅާފައިނުވާ ކެންޑިޑޭޓުންނާއި އެ ކެންޑިޑޭޓުންގެ ރަސްމީ އިންތިޚާބީ އެޖެންޓުގެ މައްސަލަ ދަޢުވާކުރެއްވުމަށްޓަކައި، ޕްރޮސެކިއުޓަރ ޖެނެރަލްގެ އޮފީހަށް ފޮނުވުމާގުޅޭ.

ރައްޔިތުންގެ މަޖިލީހުގެ އިންތިޚާބު 2024 ގައި ވާދަކޮށްފައިވާ ކެންޑިޑޭޓުންގެ ތެރެއިން، ކޮމިޝަނަށް ހުށަހަޅަންޖެހޭ މާލީ ބަޔާންތައް ކޮމިޝަނަށް ހުށަހަޅާފައިނުވާ ކެންޑިޑޭޓުންނާއި އެ ކެންޑިޑޭޓުންގެ ރަސްމީ އިންތިޚާބީ އެޖެންޓުގެ މައްސަލަ ދަޢުވާ ކުރެއްވުމަށްޓަކައި، ޕްރޮސެކިއުޓަރ ޖެނެރަލްގެ އޮފީހަށް ފޮނުވުމަށް މީގެ ކުރީން ކޮމިޝަނުން ނިންމަވާފައިވާތީ، އެގޮތުގެމަތިން ކުރިއަށް ގެންދިއުމަށާއި، މިގޮތުން، މާލީ ބަޔާން ކޮމިޝަނަށް ހުށަހަޅާފައިނުވާ ކެންޑިޑޭޓުންނާއި އެ ކެންޑިޑޭޓުންގެ ރަސްމީ އިންތިޚާބީ އެޖެންޓުގެ މަޢުލޫމާތާއި، އެކަންކަމާ ގުޅިގެން މިހާރު ކޮމިޝަނުގައި ހުރި ހެކިތަކާއި ލިޔެކިޔުންތަކާއެކު، އިތުރަށް ޖިނާއީ ތަޙުޤީޤެއް ކުރުމެއްނެތި، މި މައްސަލައަށް ގޮތެއް ނިންމެވުމަށްޓަކައި، މި މައްސަލަ 2024 އޮގަސްޓު 18 ވާ އާދީއްތަ ދުވަހުގެ   15:00ގެ ކުރީން، ޕްރޮސެކިއުޓަރ އޮފީހަށް ފޮނުވުމަށް، ކޮމިޝަނުގެ 841 ވަނަ ޢާންމު ޖަލްސާގައި ވަނީ ނިންމަވާފައެވެ.

 

4. މޯލްޑިވްސް ރިފޯމު މޫވްމަންޓް އުވާލުމާ ގުޅޭ

މޯލްޑިވްސް ރިފޯމް މޫވްމަންޓް (އެމް.އަރ.އެމް) ގައި ޤާނޫނު ލާޒިމް ކުރާ 3000 (ތިންހާސް) މެންބަރުން ހަމަކުރުމަށް 2024 މާރިޗު 7 ގައި ދީފައިވާ ނޯޓިހުގެ މުއްދަތު 2024 ޖޫން 7 އަށް ހަމަވިއިރު، އެމް.އަރ.އެމް އަށް ޤާނޫނު ލާޒިމްކުރާ ޢަދަދަށް މެންބަރުން ހަމަކުރެވިފައި ނެތަތީވެ، މޯލްޑިވްސް ރިފޯމު މޫވްމަންޓް އުވާލުމާ ގުޅޭގޮތުން، ކޮމިޝަނަށް ހުށަހަޅާފައިވާ މެމޯ، ކޮމިޝަނުގެ 5 މެންބަރުން ހަމަވާ ޖަލްސާއަކަށް ހުށަހެޅުމަށް، ކޮމިޝަނުގެ 841 ވަނަ ޢާންމު ޖަލްސާގައި ވަނީ ނިންމަވާފައެވެ.

 

5. އެސޯސިއޭޝަން އޮފް އޭޝިއަން އިލެކްޝަން އޮތޯރިޓީސް (އޭ.އޭ.އީ.އޭ) ގެ އެގްޒެކެޓިވް ބޯޑުގެ މެންބަރެއްގެ ގޮތުގައި ދެވަނަ ދަޢުރަކަށް މިކޮމިޝަން ޢައްޔަންކުރެއްވުމަށް ނަން ހުށަހެޅުމާގުޅޭ.

އެސޯސިއޭޝަން އޮފް އޭޝިއަން އިލެކްޝަން އޮތޯރިޓީސް (އޭ.އޭ.އީ.އޭ) ގެ އެގްޒެކެޓިވް ބޯޑުގެ މެންބަރެއްގެ ގޮތުގައި (ސައުތު އޭޝިއަން ރީޖަން)، ދެވަނަ ދަޢުރަކަށް އިލެކްޝަންސް ކޮމިޝަނުގެ ނަން، އޭ.އޭ.އީ.އޭގެ ސެކްރެޓޭރިއެޓަށް ފޮނުވުމަށް، ކޮމިޝަނުގެ 841 ވަނަ ޢާންމު ޖަލްސާގައި ވަނީ ނިންމަވާފައެވެ.

އަދި، އޭ.އޭ.އީ.އޭ ގެ އެގްޒެކެޓިވް ބޯޑަށް، މިކޮމިޝަނުން އެއްވެސް ފައިސާއެއް ދައްކަން ޖެހޭ ކަަމަށްވަނީނަމަ، އެކަމުގެ ތަފްޞީލްތައް ކޮމިޝަނަށް މިއަށްވުރެ ސާފުކޮށް ހުށަހެޅުމަށްވެސް، ކޮމިޝަނުގެ 841 ވަނަ ޢާންމު ޖަލްސާގައި ވަނީ ނިންމަވާފައެވެ.

 

6. ހިއުމަން ރިސޯސް މެނޭޖްމަންޓް ސެކްޝަނުގެ ހުސްވެފައިވާ އޮފިސަރ (ޖީ.އެސް 3 – ދާއިމީ) ގެ މަޤާމު، ކޮމިޝަނަރސް ބިއުރޯގެ ފޮރިން ރިލޭޝަންސް އޮފިސަރގެ މަޤާމަށް ބަދަލުކުރުމާއި، ބިއުރޯއިން މުވައްޒަފަކު ހިއުމަން ރިސޯސް މެނޭޖްމަންޓް ސެކްޝަނަށް ބަދަލުކުރުމާ ގުޅޭ.

މިހާރު ހުސްވެފައިވާ ހިއުމަން ރިސޯސް މެނޭޖްމަންޓް ސެކްޝަންގެ އޮފިސަރ – ޖީ.އެސް 3 ގެ މަޤާމް، ކޮމިޝަނަރސް ބިއުރޯއަށް ބަދަލު ކުރުމަށާއި، މިގޮތުން އެ މަޤާމުގެ ނަން ފޮރިން ރިލޭޝަންސް އޮފިސަރ ގެ ނަމަށް ބަދަލުކޮށް، މަޤާމަށް މުވައްޒަފަކު ހޯދުމަށްޓަކައި އިޢުލާންކުރުމަށް، ކޮމިޝަނުގެ 841 ވަނަ ޢާންމު ޖަލްސާގައި ވަނީ ނިންމަވާފައެވެ. 

މި ނިންމެވުމާ ގުޅިގެން، ފޮރިން ރިލޭޝަންސް އޮފިސަރ ގެ މަޤާމަށް މުވައްޒަފަކު ލިބުމުން، ކޮމިޝަނަރސް ބިއުރޯގައި މިވަގުތު ތިބި މުވައްޒަފުންގެ ތެރެއިން، ކޮންމެވެސް 1 މުވައްޒަފަކު ސެކްރެޓަރީ ޖެނެރަލްގެ ބެއްލެވުމުގެ ދަށުން، ހިއުމަން ރިސޯސް މެނޭޖްމަންޓް ސެކްޝަނަށް ބަދަލުކުރުމަށްވެސް، ކޮމިޝަނުގެ 841 ވަނަ ޢާންމު ޖަލްސާގައި ވަނީ ނިންމަވާފައެވެ.

 

7. ޕްލޭނިންގ، ޕޮލިސީ އެންޑް ރިސަރޗް ސެކްޝަނާއި، ހިއުމަން ރިސޯސް މެނޭޖްމަންޓް ސެކްޝަނަށް ވެރިން ކަނޑައެޅުމާގުޅޭ.

ހިއުމަން ރިސޯސް މެނޭޖްމަންޓް ސެކްޝަނުގައި މިވަގުތު ދެ އެސިސްޓެންޓް ޑިރެކްޓަރުން ތިބުމާއި، ޕްލޭނިންގ ޕޮލިސީ އެންޑް ރިސަރޗް ސެކްޝަނުގައި ދާއިމީ ވެރިއަކު ކަނޑައަޅާފައި ނުވާތީވެ، 2024 އޮގަސްޓު 25 ވާ އާދީއްތަ ދުވަހުން ފެށިގެން، އެސިސްޓެންޓް ޑިރެކްޓަރ ފާޠިމަތު ސައުޝަން މޫސާ ޕްލޭނިންގ ޕޮލިސީ އެންޑް ރިސަރޗް ސެކްޝަނަށް ބަދަލުކޮށް، އެ ސެކްޝަން ހިންގުން މި މުވައްޒަފާ ޙަވާލުކޮށް، ހިއުމަން ރިސޯސް މެނޭޖްމަންޓް ސެކްޝަން ހިންގުން އެސިސްޓެންޓް ޑިރެކްޓަރ ވިޝާޙް ސަޢީދުއާ ޙަވާލުކުރުމަށް، ކޮމިޝަނުގެ 841 ވަނަ ޢާންމު ޖަލްސާގައި ވަނީ ނިންމަވާފައެވެ.