ތަޢާރަފް

 

މި ޖަލްސާގެ ރިޔާސަތު ބެލެހެއްޓެވީ ކޮމިޝަނުގެ ރައީސް ފުއާދު ތައުފީޤް އެވެ. މިޖަލްސާގައި ކޮމިޝަނުގެ 5 މެންބަރުން ބައިވެރިވެ ވަޑައިގެންނެވިއެވެ. އެއީ ކޮމިޝަނުގެ ރައީސް ފުއާދު ތައުފީޤް، ކޮމިޝަނުގެ ނައިބު ރައީސް ޢަލީ ނަޝާޠު، މެންބަރު ޑޮކްޓަރު މުޙައްމަދު ޒާހިރު، މެންބަރު މުޙައްމަދު ޢާޞިފް އަދި މެންބަރު ޙަސަން ޒަކަރިއްޔާއެވެ.

 

މި ޖަލްސާގައި ނިންމާފައިވާ ނިންމުންތައް ތިރީގައި މިވަނީއެވެ.

 

1. އެޑްމިނިސްޓްރޭޝަން އެންޑް ސަޕޯޓް ސަރވިސް ސެކްޝަންގެ އޮފީސް އެސިސްޓެންޓް މަޤާމަށް މުވައްޒަފެއް ނެގުމާ ގުޅޭ.

އެޑްމިނިސްޓްރޭޝަން އެންޑް ސަޕޯޓް ސަރވިސް ސެކްޝަނުގެ ދާއިމީ އޮފީސް އެސިސްޓެންޓް (އެސް.އެސް 3) ގެ މަޤާމަށް  މުވައްޒަފަކު ނެގުމަށް މި ކޮމިޝަނުން ޢާންމުކޮށްފައިވާ އިޢުލާނާ ގުޅިގެން، މި މަޤާމަށް ކުރިމަތިލާފައިވާ ފަރާތްތަކުގެ ތެރެއިން ޝަރުޠުހަމަވާ ފަރާތްތަކަށް އިމްތިޙާން ދީ އިންޓަރވިއު ކުރުމަށްފަހު، ވަޒީފާއަށް ނެގުމުގެ ކުރިން ބަލަންޖެހޭ ކަންކަމަށް ބެލުމަށްފަހު، އަދި އެންމެ މަތިން މާރކްސް ލިބިފައިވާ، އިބްރާހީމް ޢަޡްމަތު، މއ.ދަނގަޑުކެޑިގެ، މާލެ، ދާއިމީ އޮފީސް އެސިސްޓެންޓް (އެސް.އެސް 3) މަޤާމަށް، 2024 ސެޕްޓެންބަރ 1 ވަނަ ދުވަހުން ފެށިގެން ހަމަޖެއްސުމަށް، ކޮމިޝަނުގެ 842 ވަނަ ޢާންމު ޖަލްސާގައި ވަނީ ނިންމަވާފައެވެ.

 

2. އެސިސްޓެންޓް ޑިރެކްޓަރ ވިޝާހު ސަޢީދު ގެ މުސާރަނުލިބޭ ޗުއްޓީއާ ގުޅޭ.

ހިއުމަން ރިސޯސް މެނޭޖްމަންޓް ސެކްޝަނުގެ އެސިސްޓެންޓް ޑިރެކްޓަރ ވިޝާހު ސަޢީދު، މުސާރަ ނުލިބޭ ޗުއްޓީއަކަށް އެދިފައިވާތީ، އެކަމާ ގުޅިގެން މީގެ ކުރީން ކޮމިޝަނުން ނިންމަވާފައިވާ ގޮތުގެމަތީން ކުރިއަށް ގެންދިއުމަށާއި، މިގޮތުން ކޮމިޝަނުގެ މުވައްޒަފުންނަށް ގަވައިދުގައި ބަޔާންކޮށްފައިވާ މުސާރަ ނުލިބޭ 90 ދުވަހުގެ ޗުއްޓީގެ ތެރެއިން، މި މުވައްޒަފުގެ މިހާރު ބާކީ އޮތް 14 ދުވަސް ނެގުމުގައި ކޮމިޝަނުގެ އެއްވެސް އިޢުތިރާޒެއް ނެތްކަމަށް، ކޮމިޝަނުގެ 842 ވަނަ ޢާންމު ޖަލްސާގައި ވަނީ ނިންމަވާފައެވެ.

 

3. 2024 ޖުލައި މަހުގެ ޚަރަދު ރިޕޯޓާ ގުޅޭ.

2024 ޖުލައި މަހުގެ ޚަރަދު ރިޕޯޓު ކޮމިޝަނުގެ 842 ވަނަ ޢާންމު ޖަލްސާގައިވަނީ، ކޮމިޝަނާ ޙިއްޞާ ކޮށްފައެވެ.

 

4. 2024 ފެބުރުވަރީ 10 އަދި 2024 ޖުލައި 20 ގައި ބޭއްވި ބައ-އިލެކްޝަންތަކުގެ ވޯޓު ކަރުދާސް ނައްތާލުމާ ގުޅޭ.

އިންތިޚާބުތަކާބެހޭ ޢާންމު ޤާނޫނުގެ 64 ވަނަ މާއްދާގައިވާ ގޮތުގެމަތިން އިންތިޚާބުގެ ނަތީޖާއާމެދު ހިތްހަމަނުޖެހިގެން އެކަމާމެދު ގޮތެއް ނިންމައިދިނުމަށް އެދި އިންތިޚާބުގެ ރަސްމީ ނަތީޖާ އިޢުލާނުކުރިތާ ގިނަވެގެން 14 ދުވަސް ހަމަވިއިރު، އެއްވެސް ފަރާތަކުން ޝަކުވާއެއް ހުށަހަޅުއްވާފައި ނުވާތީ، 2024 ފެބުރުއަރީ 10 އަދި ޖުލައި 20 ވީ ހޮނިހިރު ދުވަހު ބޭއްވި ލޯކަލް ކައުންސިލްތަކުގެ ބައި-އިލެކްޝަނާއި، އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ ބައި-އިލެކްޝަންގެ ވޯޓު ކަރުދާސްތައް ނައްތާލުމަށް، ކޮމިޝަނުގެ 842 ވަނަ ޢާންމު ޖަލްސާގައި ވަނީ ނިންމަވާފައެވެ.

 

5. ރައްޔިތުންގެ މަޖިލީހުގެ އިންތިޚާބު 2024 ގައި ވާދަކުރެއްވި ކެންޑިޑޭޓުންގެ މާލީ ބަޔާނާ ގުޅޭ.

ރައްޔިތުންގެ މަޖިލީހުގެ އިންތިޚާބު 2024 ގައި ވާދަކުރެއްވި ކެންޑިޑޭޓުންގެ ތެރެއިން، މާލީ ބަޔާންތައް ކޮމިޝަނަށް ހުށަނާލާ ކެންޑިޑޭޓުންނާއި އެ ކެންޑިޑޭޓުންގެ ރަސްމީ އިންތިޚާބީ އެޖެންޓާމެދު ދަޢުވާކުރުމަށްޓަކައި ޕްރޮސިކިއުޓަރ ޖެނެރަލްގެ އޮފީހަށް ފޮނުވުމާ ހަމައަށް ލިބޭ މާލީ ބަޔާންތަކަކީ، އެއީ ކޮމިޝަނަށް ލިބިފައިވާ މާލީ ބަޔާންތަކެއްގެ ގޮތުގައި ބެލުމަށާއި، އަދި މި މައްސަލަ ޕްރޮސިކިއުޓަރ ޖެނެރަލްގެ އޮފީހަށް ފޮނުވުމާ ހަމައަށް، ނުލިބޭ މާލީ ބަޔާންތަކަކީ ކޮމިޝަނަށް ނުލިބޭ މާލީ ބަޔާންތަކެއްގެ ގޮތުގައި ކަނޑައެޅުމަށް، ކޮމިޝަނުގެ 842 ވަނަ ޢާންމު ޖަލްސާގައި ވަނީ ނިންމަވާފައެވެ.

 

6. މޯލްޑިވްސް ރިފޯމު މޫވްމަންޓް އުވާލުމާގުޅޭ.

ސިޔާސީ ޕާޓީގެ ޤާނޫނު ލާޒިމުކުރާ ޢަދަދަށް 3000 (ތިންހާސް) މެންބަރުން ހަމަވެފައިނުވާތީވެ، މޯލްޑިވްސް ރިފޯމު މޫވްމަންޓް (އެމް.އާރ.އެމް) އުވާލުމަށާއި، އަދި މިކަމާ ގުޅިގެން ކޮމިޝަނުން ފުރިހަމަ ކުރަންޖެހޭ އިޖުރާޢަތްތައް ފުރިހަމަކުރުމުގެ މަސައްކަތް 2024 އޮގަސްޓް 21 ވަނަ ދުވަހުން ފެށިގެން ކުރިއަށް ގެންދިއުމަށް، ކޮމިޝަނުގެ 842 ވަނަ ޢާންމު ޖަލްސާގައި ވަނީ ނިންމަވާފައެވެ.

އަދި ދަންނަވަމެވެ. މިކަމާ ގުޅިގެން މޯލްޑިވްސް ރިފޯމު މޫވްމަންޓް (އެމް.އާރ.އެމް) އުވާލުމާ ގުޅުންހުރި އެންމެހާ ތަފްޞީލްތައް ލިޔުމުން، ކޮމިޝަނަރސް ބިއުރޯއާ ޙިއްސާކުރުމަށްވެސް، ކޮމިޝަނުގެ 842 ވަނަ ޢާންމު ޖަލްސާގައި ވަނީ ނިންމަވާފައެވެ.

 

7. އިންތިޚާބާބެހޭ ޢާންމު ޤާނޫނުގައި ބަޔާންކޮށްފައިވާ ގޮތުގެމަތިން މާލީ ބަޔާން ހުށަހަޅާފައިނުވާ މީހުންގެ ޖޫރިމަނާކުރުމާއި، އިންތިޚާބާބެހޭ ޢާންމު ޤާނޫނުގެ ކަނޑައެޅިފައިވާ އިޖުރާޢަތްތަކާ ޚިލާފުވާ ފަރާތްތަކާ މެދު އިދާރީ ފިޔަވަޅުއެޅުއްވުމުގެ ބާރު ކޮމިޝަނަށް ލިބިދެވޭނެހެން އިންތިޚާބުތަކާބެހޭ ޢާންމު ޤާނޫނަށް އިޞްލާޙު ކުރުމާގުޅޭ.

2023 ވަނަ އަހަރުގެ ރައްޔިތުންގެ މަޖިލީހުގެ ގުރައިދޫ ދާއިރާގެ ބައި-އިލެކްޝަނާއި، 2023 ވަނަ އަހަރުގެ ރިޔާސީ އިންތިޚާބުގައި ވާދަކުރެއްވި ކެންޑިޑޭޓުންގެ ތެރެއިން، އިންތިޚާބުތަކާބެހޭ ޢާންމު ޤާނޫނުގެ 73 ވަނަ މާއްދާގައި ބަޔާންކޮށްފައިވާ ގޮތުގެމަތިން ކޮމިޝަނަށް ހުށަހަޅަންޖެހޭ މާލީ ބަޔާންތައް ކޮމިޝަނަށް ހުށަހަޅާފައިނުވާ ކެންޑިޑޭޓުން ޖޫރިމަނާކުރުމަށް ކޮމިޝަނުން މީގެ ކުރީން ނިންމަވާފައިވާ ނިންމެވުންތައް ދެމެހެއްޓުމަށް، ކޮމިޝަނުގެ 842 ވަނަ ޢާންމު ޖަލްސާގައި ވަނީ ނިންމަވާފައެވެ.

މި ނިންމެވުމާއި ގުޅިގެން، އިންތިޚާބުތަކުގެ ޢާންމު ޤާނޫނުގެ ކަނޑައެޅިފައިވާ އިޖުރާޢަތްތަކާ ޚިލާފުވާ ފަރާތްތަކާ މެދު އިދާރީ ފިޔަވަޅުއެޅުއްވުމުގެ ބާރު ކޮމިޝަނަށް ލިބިދެވޭނެހެން އިންތިޚާބުތަކާބެހޭ ޢާންމު ޤާނޫނަށް އިޞްލާޙުގެނައުމަށްޓަކައި، ޑްރާފްޓްކޮށް ކޮމިޝަނަށް ހުށަހެޅުމަށް، ކޮމިޝަނުގެ 842 ވަނަ ޢާންމު ޖަލްސާގައި ވަނީ ނިންމަވާފައެވެ. 

 

8. ރައްޔިތުންގެ މަޖިލީހުގެ އިންތިޚާބު 2024 އާ ގުޅިގެން، ތަޙްޤީޤު ކުރަންޖެހޭ 2 މައްސަލަ ތަޙްޤީޤްކުރުމާ ގުޅޭ.

ރައްޔިތުންގެ މަޖިލީހުގެ އިންތިޚާބު 2024 އާ ގުޅިގެން، ތަޙްޤީޤު ކުރަންޖެހޭ ދެ މައްސަލަކީ، ޤާނޫނު ނަންބަރު 11/2008 (އިންތިޚާބުތަކާބެހޭ ޢާންމު ޤާނޫނު)ގެ 74 ވަނަ މާއްދާގެ (ހ) ގެ 27 ވަނަ ނަންބަރުގައި ބަޔާންކުރާ ކުށެއް ކަމަށްވާތީއާއި،  މި ދެ މައްސަލަ ޕްރޮސިކިއުޓަރ ޖެނެރަލަށް ހުށަހެޅުމަށް ޖިނާއީ ތަޙްްޤީޤް ފުރިހަމަކުުރުމަށްޓަކައި ބަޔާން ނެގުމަށް އެ ފަރާތްތަކަށް ގުޅިއިރު، ތުހުމަތު ކުރެވޭ ގދ. މަޑަވެލި، ވިންޑްސްކްރީން، މުޙައްމަދު ޝިރާއު ޒާހިރު (A297541) ދިރިއުޅެނީ ގދ. މަޑަވެލީގައި ކަމަށް ބުނެފައިވާތީއާއި، އަދި ކުށުގެ ތުހުމަތު ކުރެވޭ ބަނަފްސާގެ، ޢާބްދުﷲ މުޙުސިން (A086873) ގެ ފޯނު ނިއްވާލާފައިވުމުން އެ ފަރާތާ ގުޅޭގޮތެއްވެފައިނުވާތީވެ، މި ދެ މައްސަލަ ޕްރޮސެކިއުޓަރ ޖެނެރަލްއަށް ފޮނުވުމުގެ ކުރިން ތުހުމަތު ކުރެވޭ ފަރާތްތަކުގެ ބަޔާން ނެގުމަކީ ތަޙްޤީޤު ފުރިހަމަ ކުރުމަށްޓަކައި ކުރުން ލާޒިމުކަމަކަށްވާތީވެ، މި ދެ މައްސަލައިގެ ޖިނާއީ ތަޙްޤީޤް ފުރިހަމަކުރުމަށްޓަކައި، ޖިނާޢީ އިޖުރާއަތުގެ ޤާނޫނުގެ 76 ވަނަ މާއްދާގެ ބަޔާންކޮށްފައިވާ ގޮތުގެމަތިން ދިވެހި ފުލުހުންގެ ޚިދުމަތާއެކު ޖޮއިންޓް އިންވެސްޓިގޭޝަނެއް ކުރިއަށް ގެންދިއުމަށް، ކޮމިޝަނުގެ 842 ވަނަ ޢާންމު ޖަލްސާގައި ވަނީ ނިންމަވާފައެވެ.

 

9. ލޯކަލް ކައުންސިލްތަކުގެ އިންތިޚާބުގެ ޤާނޫނާއި ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ޤާނޫނަށް އައިސްފައިވާ އިސްލާޙުތަކާ ގުޅޭ.

ޤާނޫނު ނަންބަރު 10/2010 (ލޯކަލް ކައުންސިލްތަކުގެ އިންތިޚާބުގެ ޤާނޫނު) އަށް 7 ވަނަ އިޞްލާޙު ގެނައުމުގެ ޤާނޫނާއި، ޤާނޫނު ނަންބަރު 7/2010 ( ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ޤާނޫނު) އަށް 12 ވަނަ އިޞްލާޙު ގެނައުމުގެ ޤާނޫނު ދިވެހި ސަރުކާރުގެ ގެޒެޓުގައި  ޝާއިޢުކޮށްފައިވާތީ، ި ދެ ޤާނޫނުގެ އިޞްލާހުތައް، ކޮމިޝަނުގެ 842 ވަނަ ޢާންމު ޖަލްސާގައި ވަނީ، ކޮމިޝަނާ ޙިއްޞާ ކޮށްފައެވެ.

 

10. 2024 ސެޕްޓެންބަރ 18 އިން 23 އަށް ސްރީލަންކާގައި ބޭއްވުމަށް ހަމަޖެހިފައިވާ އެ ޤައުމުގެ ޕްރެޒިޑެންޝަލް އިލެކްޝަން 2024 އާ ގުޅޭ.

ސްރީލަންކާގައި، 2024 ސެޕްޓެންބަރ 18 އިން 23 ގެ ނިޔަލަށް ބޭއްވުމަށް ހަމަޖެހިފައިވާ އެ ޤައުމުގެ "ޕްރެޒިޑެންޝަލް އިލެކްޝަން" އޮބްޒާވްކުރެއްވުމުގެ ދަޢުވަތު، އިލެކްޝަން ކޮމިޝަން އޮފް ސްރީލަންކާ އިން މި ކޮމިޝަނަށް ފޮނުއްވާފައިވާތީ، އެ އެ ދަޢުވަތު ޤަބޫލުކޮށް މި ކޮމިޝަނުގެ ފަރާތުން، ކޮމިޝަނުގެ ރައީސް ފުއާދު ތައުފީޤް ބައިވެރިވެ ވަޑައިގަންނަވާގޮތަށް، ކޮމިޝަނުގެ 842 ވަނަ ޢާންމު ޖަލްސާގައިވަނީ ނިންމަވާފައެވެ.

 

11. އެސޯސިއޭޝަން އޮފް އޭޝިއަން އިލެކްޝަން އޮތޯރިޓީސް (އޭ.އޭ.އީ.އޭ) އަށް، މިކޮމިޝަނުން ދައްކަންޖެހޭ މެންބަރޝިޕް ފީ އާ ގުޅޭ.

އެސޯސިއޭޝަން އޮފް އޭޝިއަން އިލެކްޝަން އޮތޯރިޓީސް (އޭ.އޭ.އީ.އޭ) އަށް މެންބަރު ޤައުމުތަކުން ކޮންމެ އަހަރަކު، މެންބަރޝިފް ފީއެއްގެ ގޮތުގައި އެ އެސޯސިއޭޝަނަށް $1000 (އެއްހާސް) ޑޮލަރު ދައްކަންޖެހޭނެ ކަމަށް އެ އެސޯސިއޭޝަންގެ ޗާޓަރގައި ބަޔާންކޮށްފައިވާތީއާއި، މިކޮމިޝަނުން 2012 ވަނަ އެ އެސޯސިއޭޝަންގައި ބައިވެރިވެ ވަޑައިގަތުމަށް ނިންމަވާ، އެކަން 2014 ވަނަ އަހަރުގެ އެ އެސޯސިއޭޝަންގެ އަހަރީ ޢާންމު ބައްދަލުވުމުން ނިންމަވާފައިވާތީ، މިކޮމިޝަނުންވެސް އެހެން މެންބަރު ޤައުމުތަކުން އެ އެސޯސިއޭޝަންއަށް ދައްކަންޖެހޭ މެންބަރޝިފް ފީ ދެއްކުން ލާޒިމުވެފައިވީނަމަވެސް، 2014 ވަނަ އަހަރުން ފެށިގެން، މިއަދާ ހަމައަށް އެއްވެސް އަހަރަކު އެ ފީ، މި ކޮމިޝަނުން އެ އެސޯސިއޭޝަންއަށް ދައްކާފައިނުވާތީ، މިކަމާ ގުޅޭގޮތުން މާލީ ވުޒާރާއާ މަޝްވަރާކުރުމަށްފަހު، 2014 ވަނަ އަހަރުން ފެށިގެން މިއަހަރުގެ ނިޔަލަށް އެ އެސޯސިއޭޝަނަށް ދައްކަންޖެހޭ ފައިސާ، 2025 ވަނަ އަހަރުގެ ބަޖެޓްގެ ތެރެއިން ހަމަޖެއްސުމަށްފަހު، އެ އެސޯސިއޭޝަނަށް ދެއްކުމަށް، ކޮމިޝަނުގެ 842 ވަނަ ޢާންމު ޖަލްސާގައި ވަނީ ނިންމަވާފައެވެ.

މި ނިންމެވުމާ ގުޅިގެން މިކޮމިޝަނުގެ ބަޖެޓުގެ ޙާލަތާއި، ޤައުމުގެ މާލީ ޙާލަތު ބަޔާންކޮށް މި ފައިސާ މިއަހަރު ދެއްކޭނެ ގޮތެއް ނެތްކަމާއި، އެހެންނަމަވެސް، 2025 ވަނަ އަހަރުގެ ބަޖެޓުގެ ތެރެއިން، މި ފައިސާ ދެއްކޭނެ ގޮތެއް ކޮމިޝަނުން ބަލަމުންދާކަމާއި، ވޭތުވެދިޔަ އަހަރުތަކުގެ ފައިސާ، މިއަންނަ އަހަރުގެ ބަޖެޓުން ދެއްކޭތޯ ކޮމިޝަނުން މަސައްކަތްކުރާ ކަމަށް ބަޔާންކޮށް، އެ އެސޯސިއޭޝަނަށް ލިޔުމަށް، ކޮމިޝަނުގެ 842 ވަނަ ޢާންމު ޖަލްސާގައި ވަނީ ނިންމަވާފައެވެ.